'Ma 'wla ‑ma ‑gbu" 'a feeɛ' i
84
'Dʋ ‑wlʋa 'e 'dʋ ‑jeopoi 'a 'dʋsbɛ 'di ɛ. Kore 'a "nynuu ‑a ble ɛɛ' 'dʋ tu, ‑si' ‑plʋ mɛ ʋʋa bla.
2 Tʋ "bo kea "sʋɩ 'a klaa",
'ma 'jeɛ ‑ma ‑tena 'a "dia.
3 'Ma 'wla ‑ma ‑gbu" 'di mua' 'a ‑fli i Tʋ "bo Kea,
'ma 'kmʋ ‑wee'‑ "klein a 'da ‑aʋn ‑ɛ 'kmʋnɩ Kea.
4 ‑Tɩɩn"‑ 'bleɛ ‑gbu", 'tata ‑mɛ 'bleɛ 'jro ɛɛ jea ɛɛ' "nynuu 'di po,
'de ‑ma 'sraa ‑saɩn' Tʋ "bo Kea sʋɩ" ‑nɩa 'e jaʋn 'di 'a klaa",
Tʋ "bo, tʋ ‑fɔn Kea 'ma 'blei‑, 'ma Kea.
5 'Mʋa‑ nʋ nyʋ ‑ʋʋ ‑tia" 'de ‑ɩn o ‑gbu" ɛ,
ʋʋa muɛ ‑ma 'nynɩ "i 'bɛɛa' see. ‑Te' ‑kwlʋ.
6 Nyʋ ‑ʋʋa 'kpɩ 'blea' 'wlʋa 'e ‑mɔ 'ʋn ʋʋ nʋ 'mʋa‑,
ɛ ke nyʋ ‑ʋʋa jia 'de ‑ʋn ‑pee 'de ʋʋa' pɛe o ʋʋa' 'jeɛ tɔ' 'dɔe.
7 ‑Bo ʋʋa sea 'e "ni 'a wlao 'di ‑tie" cɛn ɛ,
Kea pooɛ fai" ɛɛ nʋʋɛ "ni 'a "jru 'ʋn "diwan‑ ni ɛ jeɛ kpʋn.
8 Ka ʋʋa na, 'ka ʋʋa' 'kpɩ 'a 'kpaa "kpei,
‑wɛe ʋʋ nyni 'e Kea "juɛi 'de Selisalɛmʋ.
9 Tʋ "bo, 'oo kea ‑nɩa 'e jaʋn 'di ɛ,
‑ɩn po 'ma baewlu doun" o,
‑te' doun" Sakɔbʋ 'a Kea. ‑Te' ‑kwlʋ.
10 'Oo Kea, ‑mɔ ‑ɔɔ kaan ‑a "i ɛ,
‑ɩn ‑gbʋn "ju ‑ɩn poa 'cna "jru ja, ‑ɩn siɔ "jriɛ o.
11 'Wɩ due' nʋa' 'de ‑ma ‑gbu" 'di "paa
ɛ je ‑ɩn nʋ 'wɩ 'a "wlu due' 'de "kpae' ‑sii.
Dɛ ‑nʋɛ Kea 'a ‑gbu" 'a ‑gbɛnjei" nynaa' "paa
ɛ je 'diwɔnyniiʋn 'a poo" ‑sɔn ‑tea' ‑sii.
12 Tʋ "bo Kea, ka 'jrʋ ke "i kaandɛ nɩa
'kamɔ ɛ nɩ 'de ‑aa ‑tɩ' 'ʋn.
Tʋ "bo a nʋɛ nyʋ 'saaʋn ke 'nynɩ 'wlʋʋa' "jrii.
Nyʋ ʋʋa naa ɛɛ' ‑jei" 'de "isrɛa 'ʋn
ɛɛ' mliian ʋʋpʋ‑ 'dɔe nʋa' "jrii.
13 Nyɔsoa, Tʋ "bo, tʋ ‑fɔn Kea ‑nɩa 'de jaʋn 'di ɛ,
'mʋa‑ nʋ nyɔ ‑ɔ ‑tea' ɔɔ' 'kmʋ 'de ɛ 'kwa a.